පළමු දිගහැරුම

දෙකයි හතරයි හයයි හතයි අටයි අටයිපනහයි.ශික් සත පනහක් අඩුයි  ... කොටා බලපන් උඹගාව තව සත පනහක් නැද්ද කියලා.....මම කොටාගෙන් ඇහැවුවේ නැහැ කියලා දැන දැනමයි .ඌත් ලඟ නැහැකියලා දැන දැනම සාක්කු වලට අතදැම්මා. තියන ගාන බ්‍රිස්ටල් එකකටනම් ඇති එත් අපි ජෝන් ප්ලේයර් ලානෙ. අනික දෙන්නෙකුට බ්‍රිස්ටල් එක මදි....
අඩේ නැහැ බං ...තිබිච්ච් හතර තමයි දුන්නෙ ඇයි මදිද.. මදි හිංදා නේන්නං උගුඩුවො ඉල්ලන්නෙ...හිතුව ඉතරයි මම කිව්වෙ නැහැ.
පවු අප්පා මේකා තාම හොයනවා ඒත් ඉතින්ං ඔය සාක්කු වලනම් සල්ලි තියෙන්න බැහැ ඕකගෙ වැඩි හරියක් කලිසම්වල සාක්කු වල අඩිය නැහැ අත් දාගෙනම ඉඳලා ඉරිලා අත දැම්මම අහුවෙන්නෙ වෙන වෙන ඒව..
මහගානක් නෙමෙයි නෙ දෙයියිඅන්ගෙ පිහිටෙන් තිබුනොත් ගොඩ කියලා හිතාන මමත් දැම්මා පොත් බෑග් එකට අත....අඩියටම අත දාන්නත් බයයි මොක්කු ඉන්නවද දන්නෙ නැහැ. මොනාද මේ ..ම්ම් වෙලිච්ච පාං කෑල්ලක්......ගිය සතියෙ නැතිඋන පෑනෙ කොපුව....ඊලඟට හුටා කැරපොත්තෙක් නේද..නෑ..නෑ.. ඊට වඩා හයියයි..මොකක්ද...ආ මේ 555 අයි.සී. එකක්..

කොටත් බලාන ඉන්නවා බලාපොරොත්තු ගොන්නක් හිතේ පොදි බැඳගෙන...ඇයි ඉතින් ඌට හොයන්න කියලා බෑග් එකක් තියෙන එකක් යැ....විෂයන් එකොලහටම පොත් තුනයි....එකොලහක් කිව්වට වැඩිම උනොත් ඕක යන්නෙ විෂයන් හයකට නැත්නම් හතකට...
ම්හු .. නැහැ.. බලමු බෑග් එකේ අනිත් සාක්කුවෙ .....තියේවා තියේවා ....අඩෙ අහූඋනා කාසියක් තමයි සත පනහට වැඩිය ලොකුයි. ගොඩ ගොඩ රුපියල් දෙකක්. හැක්ස් එකකුත් ගන්න පුලුවන්....

හරි යමං  මම කොටාත් ඇදගෙන රිංගුවා සිංහගිරියට. සිංහගිරිය කිව්වෙ අපෙ දුකට සැපට වයස තරාතිරම උනිෆෝම් එක නොබලා සංග්‍රහ කරන කූල් ඉස්පොට් එක...

ඉස්සල්ලම දැම්මා රබර් ඇහැ ...වැඩිය කෞරුත් නැහැ..මහාවිද්දියාලෙ එකෙක් ඉන්නව ... තව දෙන්නෙක් ඉන්නව උන්ගෙ සාක්කු වල බැජ් නැහැ...එකෙකුගෙවත් දකුනු අත පේන්න නැහැ මේසෙ යට...අතේ තියනදේ කෞරුත් දකියි කියල වෙන්න ඇති..සිවිල් පිට ඉන්නෙ එකයි හෝගාල බත් එකක් කනවා.කෝකටත් බලමු.. ම්ම්ම  ආ මෙ කඩේ ගෝලයනෙ අවුලක් නැහැ..
...අංකල් ගොල්ලීෆ් එකයි හැක්ස් එකයි... මම සල්ලිදුන්නා
අංකල් සිග‍රැට් එකයි ටොපියයි දීලා සල්ලි ලාච්චුවට දාගත්තෙ අහක බලාගෙනමයි..ඒ පොරගෙ හැටිඅපි වගෙ ඉස්කෝල ගැටවු ඕනෙ නැති එව්ව ඉල්ලුවාම මිනිහගෙ පිලිවෙල ඕකයි.
...ආ පත්තු කරපං මම දුන්න කොටාට මම කොහොමත් කැමති වෙන එකෙක් පත්තු කරල බීල දෙන කොටේට එතකොට කික් ඒක වැඩියි ..
‍ෆිල්ටරේ විසිකරල හැක්ස් එකත් බෙදාගෙන කටේ දාගන්න ගමන් අපි දෙන්නා ඇදුනෙ බස්ටෑන්ඩ් එකට...
.......කුස්සා මම මෙකෙ එල්ලෙනවා හෙට සෙට් වෙමු කියාගෙන කොටා එල්ලුනා ක‍ටුනායක බස් එකේ..
මම ඉතින් එපා කියන්න යැ... මමත් මොකුත් නොකියම හේත්තුවක් දැම්ම බස් ස්ටෑන්ඩ් එකෙ කනුවකට මම ඉතින් අපේ එකම බස් එක එනකම් තපින්න ඒපෑ තව පැය බාගයක් විතර...